Стамбул маңына "Орлан-10" дроны құлады деп хабарлады Түркия ішкі істер министрлігі.
"Барлау және бақылау үшін пайдаланылатын, ресейлік "Орлан-10"-ға ұқсас ұшу аппараты табылды" деп жазылған ведомствоның хабарламасында.
Ішкі істер министрлігі оқиғаның жай-жапсарын зерттейтінін мәлімдеді.
Жергілікті тұрғын Hurriyet басылымына дрон сәрсенбі күні құлағанын, бірақ ол жөнінде бірден хабарламағанын, себебі оның иесі болуы мүмкін деп ойлағанын жеткізді.
Осы аптада осымен екінші рет Түркия аумағында дрон табылып отыр. 15 желтоқсанда Түркия қорғаныс министрлігі Қара теңізде "бақылаусыз кеткен" дронды атып түсіргенін хабарлаған.
Ашық деректерге қарағанда, "Орлан-10" дроны 600 шақырымға дейін ұша алады және әуеде 16 сағат бола алады, 5 келіге дейін жүк көтере алады.
Ресей жағы Түркияда құлаған дрондар туралы ақпаратқа түсініктеме бермеді.